Сайт турында мәгълүмат

 2014 елдан Татарстан республикасының барлык мәктәпләрдә дә 9нчы сыйныф укучылары татар теленнән имтиханны яңача, ягъни тест рәвешендә тапшырачак.

Татар теленнән башкарылган тест эшләре укучыларның лингвистик компетенцияләрен тикшерүгә юнәлтелгән, ягъни тел материалы белән эш иткәндә, лингвистик белемнәрне күрсәтү, шулай ук танып белү, төркемләү һәм аналитикага кагылышлы белем һәм күнекмәләрне чагылдыра. Тестта бирелгән контроль бәяләү материаллары укучыларның лексик, грамматик, стилистик, орфографик кагыйдәләрне һәм пунктация нормаларын белү һәм ачыклауга юнәлдерелгән.

Тест эшенең максаты - Татарстан Республикасы гомуми белем бирү оешмаларының IX сыйныфын тамамлаучы укучыларның татар теленнән әзерлек дәрәҗәләрен бердәм республика тесты уздыру максатыннан бәяләү.

Имтихан эшендә сайлап алу мөмкинлеге булган биремнәр, кыска җавап бирүне таләп иткән биремнәр һәм укучының тәкъдим ителгән темага үз фикерен белдерә алуын тикшерүгә юнәлдерелгән ачык типтагы биремнәр файдаланыла.

Татар теленнән БРТ, Татарстан Республикасында гамәлдә булган уку-укыту программаларына нигезләнеп, 3 төркем өчен махсус әзерләнгән контроль бәяләү материаллары буенча үткәрелә: беренче төркем - татар телендә гомуми белем бирүче оешмаларның  IX сыйныф укучылары өчен, икенче төркем - рус телендә гомуми белем бирүче оешмаларның татар төркемнәрендәге IX сыйныф укучылары өчен, өченче төркем - рус телендә гомуми белем бирүче оешмаларның рус төркемнәрендәге IX сыйныф укучылары өчен әзерләнгән материалларга нигезләнә.

Сайт 9 нчы сыйныф укучыларына имтиханга әзерлек өчен төзелде. Сез бу сайтта татар һәм рус сыйныфлары өчен татар теленнән ДЙА биремнәре, изложение текстлары һәм аудиоязмалары, инша язу тәртибен, һәрбер биремгә кагыйдәләр таба алачаксыз һәм шулай ук онлайн тестлар да эшләп карау мөмкинлеге булачак.